6 பந்தில் 6 சிக்ஸர் விளாசி இளம் ஆப்கானிஸ்தான் வீரர் சாதனை

ஆப்கானிஸ்தான் பிரீமியர் டி20 லீக் கிரிக்கெட் போட்டியில் அந்நாட்டு வீரர் ஹஸ்ரத்துல்லா சசாய் 6 பந்தில் 6 சிக்சர் அடித்து சாதனை படைத்துள்ளார். ஆப்கானிஸ்தான் பிரீமியர் டி20 கிரிக்கெட் போட்டி ஐக்கிய அரபு எமிரேட்சில் நடைபெற்று வருகிறது. சார்ஜாவில் நேற்று நடந்த ஆட்டம் ஒன்றில் ஆப்கானிஸ்தான் வீரர் ஹஸ்ரத்துல்லா சசாய் 6 பந்தில் 6 சிக்சர் அடித்து சாதனை நிகழ்த்தினார். காபுல் ஸ்வானை அணி வீரரான அவர் பல்கி லெஜன்ட் அணிக்கு எதிரான ஆட்டத்தில் இந்த அதிரடி ஆட்டத்தை வெளிப்படுத்தினார்.

ஆட்டத்தின் 4-வது ஓவரை அப்துல்லா மஜாரி வீசினார். இந்த ஓவரில் தான் ஹஸ்ரசத்துல்லா 6 பந்துகளிலும் 6 சிக்சர் விளாசினார். அவர் 17 பந்தில் 62 ரன்கள் எடுத்தார். 12 பந்துகளில் அரை சதத்தை தொட்டார். ஒரே ஓவரில் 6 சிக்சர்கள் அடித்த 6-வது வீரர் என்ற பெருமையை ஹஸ்ரத்துல்லா பெற்றார். இதற்கு முன்பு கேரி சோபர்ஸ் (வெஸ்ட்இண்டீஸ்), ரவிசாஸ்திரி (இந்தியா), கிப்ஸ் (தென்ஆப்பிரிக்கா), யுவராஜ்சிங் (இந்தியா), ஜோர்டன் கிளார்க் (இங்கிலாந்து) ஆகியோர் 6 பந்துகளில் 6 சிக்சர்கள் அடித்து இருந்தனர்.

அதிரடி வீரர் கிறிஸ் கெய்ல் முன்பு ஹஸ்ரசத்துல்லா இந்த அதிரடியை நிகழ்த்தினார். அவரது அதிரடியான ஆட்டத்தை பார்த்த கெய்ல் பாராட்டினார். ஹஸ்ரசத்துல்லாவின் இந்த அதிரடி ஆட்டம் அவரது அணிக்கு உதவாமல் போனது. இறுதியில் அந்த அணி 21 ரன் வித்தியாசத்தில் தோற்றது. பல்கி லெஜன்டஸ் அணி 20 ஓவரில் 4 விக்கெட் இழப்புக்கு 244 ரன் எடுத்தது. கெய்ல் 48 பந்தில் 80 ரன் எடுத்தார். காபூல் ஸ்வானை அணியில் 7 விக்கெட் இழப்புக்கு 223 ரன்னே எடுக்க முடிந்தது.

ஒரே ஓவரில் 6 சிக்சர் அடித்தது குறித்து ஹஸ்ரத் துல்லா கூறியதாவது: கிறிஸ்கெய்ல் தான் எனக்கு முன் மாதியானவர். அவர் முன்னால் இப்படி நான் ஆடியது எனக்கே கனவை போல இருக்கிறது. வழக்கமான எனது ஆட்டத்தை ஆடினேன். இதில் நான் பல சாதனைகளை செய்து இருப்பதாக கூறுகிறார்கள். இதன் மூலம் என் பெயரும் கிரிக்கெட்டில் சாதனை பட்டியலில் இடம் பெற்று இருப்பது மகிழ்ச்சியாக இருக்கிறது. இவ்வாறு அவர் கூறினார்.